من شخبطاتي .. * ذكريات حادث أليم *

يقول ناصـر ..

لما كنت في أول ثانـوي كان وزني تقريباً 94 كجم وقصــير

يعني اللي يشوفني يقول وشذا المربع اللي يمشي قدامنا

وكان أخوي الكبير يوصلني الى شارع عام مقابل المدرسـة كل يوم

تعوّدت أنا على هالحركـة انه ينزلني على طرف الشارع العام ويتجه يمين وأنا أتجه مشي على رجيلاتي الى المدرسة عشان أحافظ على جسمي الرشيق ذيك الأيام

في يوم من الأيام صحيت الصباح ولبست ثوب جديد ما لبسته من قبل وكاشخ أحلى كشخه

شايل الكتب بيد وشنطـة من DKNY لبدلة الرياضة باليد الثانيـة

اللي كان يشوفني يقول أبد خشته مهيب خشة واحد رايح المدرسة مع الابتسامة اللي شاقة الوجه بالعرض

ركبت السيارة وكالعادة نزّلني أخوي عند التقاطع ورحت أمشي مشية الدببة الحلوة

ولما قرّبت من الرصيف

دننااااااااااااااا

===> موسيقى تأثيرية

والا سيارة ((بيوك )) قديم يقررررب مني بسرررررررررعه

أشوفه يجيني ومستحيل على قوامي الرشيق أوصل الرصيف قبله

وفي لحظة شجاعة

وقفت مقابل البيوك وبلمح البصر حطيت بدلة الرياضة على صدري

وكنت مستعد للصدمه اللي جايتني ومبقق عيوني ------> بمعنى آخر فاتحها باعلى درجة

وطررررررررررررررررررررررررررررررررررررررربق ويصدمني

في أذني اليمنى كنت أسمع صوت البريكات والسيارة تزحف

وفي أذني اليسرى كنت أسمع صوت وجهي وهو يحك بالارض بقووووة

بوصف لكم كيف كان وضع اللي أول ما صدمتني السيارة كنت عليه

لما صدمني السيارة طرت فووووق في السماااااا وكنت واقف قبلها على رجولي

نزلت الارض طبعا ولكن على وجهي وهو يحكّ الأرض ورجلي فوووق

كنت احس بالاحتكاك بالارض وأدري أني أتألم بس مافيه احساس

انعدم الاحساس في تلك اللحظات

في قرارة نفسي ------> حلوه الكلمة

داري ان وجهي متقطّع وأشوف الدم على ثيابي

وشوي ويجي الولد اللي يسوق السيارة وينزل عندي

بصراحة فكرت وقتها أقوم وأكفخه وأرجع انسدح

أو

أبقى متمدد على الارض وكتبي من حولي متناثرة

====> كان عندي واجب سهرت وأنا أحلّه وقلبي يتقطع عليه في البداية

استسلمت لفكرة اني انسدح بدون حراك

جاء الولد يبي يشيلني ماقدر

قام يصارخ وكان فيه هنود قراب مننا على الشارع

لكن محد راضي منهم يفزع وينقذني

وكل ما صارخ عليهم يرجعون على ورا أكثر من الخوف

أشوفهم لكن أحس الدنيا مهتزة شوي

حينها ...

جاء واحد من عيال ثالث ثانوي اللي تعرّفت عليه من كثر ما يمر عليه ناصر الدوووب ويسلم عليه

ويشيلني مع الولد اللي صدمني ويقطّوني في السيارة ورا

ويتجهون مسرعين للمستشفى في محاولة لانقاذ حياتي

الدماء كانت تغمر ثيابي ووجهي ينزف من كل سنتيمتر مربع

وأنا أقول آآآآآآه

لاني ما بلعب كورة اليوم

مهوب من الألم لاني ما كنت أحس فيه بصراحة

ويوصلوني المستشفى ويجون قسم الطوارئ ويحطون شي على رقبتي

حسيت اني مرتاح يوم حطوه واكتشفت انهم يحطونه احتياط يمكن تكون رقبتي انكسرت

عقبها صرت اسمعهم يقولون ون تو ثري

وودي أقول معهم بس في واحد نشبة سوري قاعد عند راسي يكلمني ايش اسمك

وأنا قاعد أقول في قلبي ورا ما يضف وجهه هذا ,,, ما يشوف حالتي ويسألني عن أسمي

ويرجع يسألني وأنا أقول مرة أخرى في قلبي والله انك نشبة

فعشت الدور اني المصاب أنا ... نا ... نااا .... نااااصـــ ..... وما قدرت أكمل أول مرة

وأسمعه يقول خلك معانا ويسولف معي يبيني ارد وبحماس والله

-----> يحسبون اني بموت وأنا منسدح لاني ابي ارتاح بس

المهم شالوني وحطوني على سرير ودخلوني داخل المبنى وقربوا مني مجتمعين كلهم

كانت معهم ممرضة أمريكية جنبي ومساكه يدي وكنت جالس ابربر بيني وبين نفسي حلال تلمسني أو لا

-------> كنت برئ

وملتزم

ما علينا المهم ان ريحة عطرها كانت تصقع خشمي

بعدها جاء السوري اللي جلست ادعي عليه ويقرّب المقص مني بيقطع ثوبي

ويجيكم ناصر يبي يدافع عن ثوبه الجديد

وأشهق بقوووووووة

أبي أقول لااااااااااااااااااااا تقطــعوووووووووووووووووووووووووووووووونه

ولكنهم بدأوا يقطّعون في ثوبي وقلبي يتقطّع قبله

وعقب ما خلصوا من ثوبي اتجهوا لفنيلتي

فقلت في قلبي عادي هذي فنيلة من فنايل أخوي الجديدة

فقطّعوها وانا اقول عليكم بالعافية

المهم عقب كل هذا دخلوني الاشعة المقطعية داخل صندوق دائري مدري وشو يبي

وانا مستمتع يودوني بالسرير ويرجعوني بالسرير

يودوني بالسرير ويرجعوني بالسرير

--------> آخر دلع

وبعد ما خلّص هذا كله جاء عمـي الصغير وكان عمره في ذيك الايام 38 سنه

ويوصلني البيت وأنزل الى الصالة وأنسدح فيها لغاية في نفسي

انتظر أهلي يجون لان كل يدخل ويشوفني منسدح بأقول آآآآآآآه

دخلت بالأول الوالدة وشافتني وبغت تموت قدامـي

فزّيت لها وقلت لها انا بخير

تقولي وين بخير ووجهك مقطّع يا ولدي

قلت لها تصدقين ما شفت وجهي في المرايا

جيبوا لي مرايا

آآآآآآآه آآآآآآآآآآآه

وجابوا لي المرايا

وما أكذب عليكم كيف كان وجهي

شفتوا وشلون الحفريات اللي كانت تصير في الشوارع أسوأ منها .. ما بقى الا أجيب لوحة مكتوب فيها مغلق وجهي للصيانة

راحت الوالدة تبلغ كل أفراد العائلة

ثم دخلت أختي بعدها ...

طبعا ما كانت تدري عن شئ شافتني والا انا منسدح وراسي ملفوف بالشاش

وخشمي عليه لزقة

وخدودي وجبهتي مجرّحه وبعنف

ناهيكم عن يدي كان فيها جبس

======> انكتبت عليه ذكريات الحارة كلها

قالت بسم الله وشفيك ناصر !!!! ..

قلت لها صار لي حادث وكانت عيني في الارض وما تطلع الحروف من مخارجها عدل

وأنا أتكلم

قالت ما تشوف شـر وصفطتني

وراحت داخل

عقبها بفترة بسيطة جاء عمي الله يرحمه ومعه بسكوت البدو

اللي ما نشوفه الا في المناسبات الرسمية

بسكوت البدو هو علبه كبيرة من حديد لونها أزرق وكلها بسكوت

-------> كانت اغراء بالنسبة لي لما كنت دب

سلّم علي وضمني بحنان

ومشى عشان ارتاح

وجاء عقبها الوالد

شافني وقال وشفيك يا ولدي قلت له سيارة صدمني

سبني طبعاً

وقال انت أعمى ما تشوف السيارات

وبعدها لفترات متقطعة مروا افراد العائلة علي واحد واحد

فنزلت أسكن في غرفة الضيوف في الدور الأرضي عشان اللي يجون يسلمون على سموي الكريم

--------> أحس الحين كأني وحده توها والده ذيك الايام

وجلست اسبوعين في البيت وقلبي معلق في الدراسة

في خلال هالفترة جاني اللي صدمني وتأسف مني وأعطاني هديه قلم كريستنديور مع عطر

وأنا رفضت في البداية لكنه أصر ّ و قالي الرسول صلى الله عليه وسلم قبل الهدية ..

أحرجني

---------> تدرون لو هو جايب لي أكل ما رديته ذيك الايام

ومرت الأيام وبدأ الدوام في المدرسة

والله العظيم كانوا يجوني طلاًب أول مرة أشوفهم في حياتي ويسلمون علي بحرارة ويتحمدون لي بالسلامة

كأنهم يعرفوني وأنا أعرفهم

وأنا ما قد شفت وجوههم من قبل

حسيت كأني مرشح للانتخابات في المدرسة

كنت شخصية مشهورة من جد اول اسبوع بعد الحادث

ومرت الأيام والأسابيع والشهور

وجلست فترة الى ان راحت آثار الحادث في وجهي

والحمدلله الحين مثل الحوووصان

من شخبطاتي . .